Tur mucha merece e mihor comienso posibel den bida. E mucha su desaroyo y experiencia ta forma un base firme pa un bida feliz, saludabel y productivo. Pero kico ta pasa, si un mucha entre 0-4 aña tin un necesidad special riba un di e 5 areanan di desaroyo? Bo kier sa mas kico ta Intervencion Trempan y dicon e ta asina importante?
Bo ta un mayor/profesional y bo tin duda of tin preocupacion den e desaroyo di un mucha of bo a señala un retraso y/of reto riba e 5 areanan di desaroyo? Bo kier sa mas con e mucha por forma parti di Intervencion Trempan di Departamento di Mucha y Hoben (DMH)?
Comunicacion ta un necesidad humano. Bo tabata sa cu un mucha entre 0 cu 6 aña por siña 2500 palabra? Pero nos tur conoce muchanan cu entre 2 cu 6 aña cu ta encontra dificultad den nan desaroyo di habla y/of idioma. Bo kier sa dicon? Bo kier sa e diferencia entre un retraso y un trastorno di desaroyo di habla of idioma cerca un mucha?
Desaroyo di habla y idioma no ta sosode di su mes. Esaki mester wordo stimula! Cuantioso di estudio ta demostra cu un retraso riba e area di comunicacion y lenguahe ta e prome señalnan, cu ta conduci na problema riba e otro areanan di desaroyo. Bo kier sa mas con pa stimula e desaroyo di idioma di un mucha?
Hopi biaha na un edad jong ta duna nos muchanan acceso na e uzo di tablet, t.v y/of telefoon. Sin ta consciente di cuanto tempo un mucha por uza esaki. Uzo excesivo di tablet/telefon cerca nos muchanan entre 2 -5 aña, ta aumenta e posibilidad di un retraso di idioma (expresivo). Bo kier sa cuanto screentime bo por ofrece un mucha entre 2-5 aña?
Pa bienestar di nos comunidad,
proteha nos mucha- y hobennan !